التلفزيون الرسمي يقطع برامجه العادية و يملأ شعار "نبأ عاجل" الشاشة بلون احمر انيق. يظهر مذيع علي الشاشة و واضح عليه الخضّة والشحتفة و هو يهيب بالمواطنين الابتعاد عن محيط حديقة الحيوان بالجيزة لدواعي أمنية!
أنا قلت أكيد وجدوا قنبلة ولّا حاجة و الشرطة تتعامل معها. شكرت ربنا ان العيال في البيت و احنا ساكنين بعيد عن الجيزة كلّها أصلاً. غيّرت القناة يمكن اي من القنوات الخاصة عندها اخبار زيادة و كانت الأخبار كالتالي:
"النسانيس هاجمت سيد قشطة و واخدين مراته رهينة"
"تلات زرافات فتحوا مطاوي علي خرتيت و مثبتينة عند جزيرة الشاي"
"سرب من ابو قردان بيهاجم قفص الأسود و مصرين ياخدو مرات الأسد معاهم"
"القرود راكبين علي النعام و رابطين فيهم رجلين حراس الأقفاص و بيسحلوهم علي الارض"
"مجموعة أفيال اقتحمت بركة التماسيح و رأسهم و الف سيف يعملوهم جزم و شنط"
حالة من الذهول ممزوجة بالمغص المعوي هجمت عليا و أنا باتفرّج علي الكلام ده. الحيوانات اتهبلت يا جدعان! بس هو يعني هاتيجي عليهم؟ ماهو البلد كلها اتهبلت.
بس كل ده كوم، و تعليقات الاعلاميين و الصحفيين كوم تاني!
قناة الجزيرة : حيوانات مصر ترفض الانقلاب العسكري و تنضم للثورة الشعبية!
توفيق عكاشة: أني جولتلكم ان أمريكا مش هاتسيب مصر ف حالها. أهي هي دي بشاير حروب الجيل الرابع!
احمد موسي: الحيوانات دي متدربة في قطر و قابضين من هناك و أنا عندي تسجيلات للقرود في احد معسكرات التدريب في الدوحة و تركيا
عمرو أديب : يا جماعة أنا كان قلبي حاسس لما زرت الجنينة اخر مرة ان في حاجة مش مظبوطة! شاكلهم كان بيخطط لحاجة.
لميس الحديدي : فين الجيش؟ يا سيادة المشير اضرب بيد من حديد و احنا وراك! اضربهم بالصواريخ.
الاخوان: الحيوانات الشرفاء رافعين شعار رابعة. فين جمعية حقوق الحيوان و أمريكا؟
محلل إستراتيجي : علي الطلاق انهم اخوان لأنهم استخدموا نفس طرق الميليشيات المسلحة اللي جايين عن طريق ليبيا
أمريكا : نطالب الحكومة المصرية بضبط النفس و الاستماع لمطالب الحيوانات العادلة
روسيا: سنقدم كل الدعم للحكومة المصرية في مواجهة الاٍرهاب الحيواني
لم اشعر باي شئ بعد استماعي الي كل هذا العك الا بمراتي و هي ماسكاني من بنطلون البيجامة و بتصوّت وانا بأحاول انط من الشباك!!
ليست هناك تعليقات:
إرسال تعليق