مراتي: احنا نازلين. الاكل في التلاجة.
أنا : طيب سلميلي علي حماتي و اختك اوي.
مراتي: يوصل. هانرجع أنا والعيال يوم السبت.
أنا : ماشي الكلام.
حالة من السكون الغير معتاد ضربت البيت اول ما مراتي قفلت الباب ورآها. طقوس اليوم العادي في البيت كانت تشمل جري مراتي بالشبشب ورا العيال علشان ياكلو او يعملو الواجب. مرات كثيرة أكون جالس في أمان الله و ينوبني من الحب جانب. فردة جزمة عابرة للقارات تلبس في قفايا، مغرفة تخطئ طريقها لضهر ابني و تستقر بإصرار علي خدي اليمين. أشياء من هذا القبيل.
شعرت بفرحة مكتومة و أنا جالس في الصالون استمتع بالهدوء. منيت نفسي بليلة سعيدة مع برامج التوك شو خصوصاً محدش هينازعني علي ملكية الريموت كنترول علشان يتفرجو علي مسلسلات او كارتون.
فتحت التلفزيون......
المذيع : (يصرخ) دول هايخربو البلد ، ده طابور خامس و شوية عيال.
الضيف: (يولول) دي مؤامرة دولية مكتملة الأركان
غيرت القناة
المذيعة : (تلطم) الأخلاق انهارت والتحرش الجنسي بقي وباء
الضيف : أصل الموروث الثقافي بتاعنا بعافية حبتين
هرشت دماغي و غيرت القناة
المذيع : (يندب) أصل أمريكا عايزة تعمل فوضي خلّاقة
الضيف: خلّاقة دي تبقي خالتهم!
تنّحت شوية وغيرت القناة
المذيعة : (محروقة اوي) الله يخرب بيت المنظمات الحقوقية و المجتمع المدني دول
الضيف: لازم يعدمو علي الخوازيق في ميدان التحرير
نظرت ببلاهة للتلفزيون و غيرت القناة. هاتفرج علي أغنية بوس الواوا أحسن!
بعد فترة من مشاهدة السيدة الفاضلة هيفا وهبي، شعرت بزيادة ملحوظة في افرازات الغدد اللعابية مع جحوظ في العين الشمال. عند هذا الحد اغلقت التلفزيون و رميت الريموت من البلكونة و قررت اعمل قاموس للمصطلحات اللي مبهدلانا في التلفزيون ليل نهار و محدش فاهم ولا كلمة!
الطابور الخامس : الطابور الذي يتكون تلقائياً علي باب فرن العيش بعد خمسة ساعات من الانتظار
الموروث الثقافي : كل ابن من حقه ان يرث والديه. أبناء الممثلين ممثلين، أبناء القضاه قضاه، أبناء الضباط ضباط..الخ!
الفوضى الخلّاقة: الاصطفاف الوطني الجليل للعربيات مع الناس و لامؤاخذة الحمير عند اي تقاطع شارعين في مصر
المجتمع المدني : رابطة خريجي قسم الهندسة المدنية بجامعة الزقازيق
المنظمات الحقوقية : قهوة في باب اللوق و يقال والله اعلم في بِركة الفيل
الشرق الأوسط الكبير : حفيد علي بك الكبير بتاع المماليك من مراتة التانية
نظرية المؤامرة : اي حد يختلف معاك في الرأي لازم تضربو بالجزمة!
و البقية تأتي....
ليست هناك تعليقات:
إرسال تعليق