المذيعة : و معانا دلوقتي مواطن هناخد رأيه في الأوضاع الراهنة. اهلا بيك معانا في برنامج كرسي في الكلوب
المواطن : اهلا بيكي يا ابله
المذيعة : حضرتك بتشتغل ايه؟
المواطن : عندي نصبة شاي و قهوة علي كوبري الورّاق
المذيعة : طيب ايه رأيك في الخطوات اللي تمت في خارطة الطريق؟
المواطن : سعادتك حالة الطرق في مصر كلها تعبانة. جوز ألبت اختي سواق علي توكتوك و كل يوم يروّح بيسب و يلعن عشان المطبات و الحُفٓر اللي فالشوارع مبهدلينو التوكتوك.
المذيعة : انا قصدي خارطة الطريق السياسية...
المواطن : ماهو لازم يبقي كله بالسياسة يا ابله، يعني الحكومة تسايسنا شوية و يصلّحوا الطرق
المذيعة : طيب بلاش دي، ايه رأيك في الاخوان؟
المواطن : والله يا ابله ابويا الله يرحمه و هو بيموت وصّاني علي اخواتي و قاللي خد بالك منهم. أصل انا ولد واحد علي سبعتاشر بت و ابونا كان شغّال في محل........
المذيعة قاطعته : يا ابني انا باتكلم عن الاخوان المسلمين
المواطن : ايوه برضه كلنا اخوات في الاسلام مفيش حاجه يعني.
المذيعة : طيب ايه رأيك في دور الاعلام بعد الثورة؟
المواطن : إنتي جيتي علي الجرح والله
المذيعة متهلله: طيب هايل ياريت تقولنا رأيك
المواطن : ايام الثورة و المظاهرات كنت بروح انا و أصحابي نبيع اعلام مصر للناس اللي في المظاهرات. كانت سبوبة لوز و عملنا قرشين كويسين. بس خلاص العملية ماتت بعد المظاهرات ما وقفت. هما بطلوا مظاهرات ليه يا أبلة ؟
المذيعة : يا ابني انا قصدي التلفزيون و الجرائد
المواطن : ااااه. والله يا أبلة انا بالم الجرايد من الشارع و ابعها بالكيلو للواد كاروته بتاع الطعمية، الرزق يحب الخفية
المذيعة : طيب بلاش. ايه رأيك في دور الجيش في حماية الدولة؟
المواطن : سعادتك انا لما جالي جواب التجنيد من تلات سنين رحت سلمت نفسي في الهايكستب بس روحوني بعد ما كشفوا عليا و قالولي ماينفعش ادخل الجيش علشان عندي رجل أطول من رجل.
المذيعة : طيب اخر سؤال، شاركت في اخر انتخابات وللا لا؟
المواطن : والله يا استاذة انا بقالي سنة بلف علي دكاترة أمراض جلدية علشان عندي انتخابات بين رجليا بسبب التصاق الفخدين. باخد مراهم كتير و مفيش حاجة نافعة. يا ريت لو حضرتك تعرفي دكتور كويس و رخيص اروحلو علشان انا تعبت قوي و ربنا يخليكي
الي هنا و سقطت المذيعة مغشياً عليها
ليست هناك تعليقات:
إرسال تعليق