مراتي عاملة زي البنزين، سريع الاشتعال، بس مينفعش العربية تمشي من غيره.
قفز هذا التشبيه الي ذهني وهي بتلف بالعربية في وسط الكورنيش و بتفتح الباب اللي ناحيتي علشان ترفسني برة و العربية ماشية علي ٨٠كم/ساعة. بصراحة كنت في منتهي النشوة لما فتحت عيني و انا في قسم العناية المركّزة و لقيتها قدامي و الدموع في عينيها. حتي لما الظابط حب يعرف انا ازاي وقعت بره العربية، قلتله أصل فيه نحلة دخلت من الشباك و انا بخاف من النحل الصراحه. لمحت نظرة عرفان من مراتي خصوصاً ان فيه شهود كانو متهمينها بالشروع في قتلي!
بس هي بصراحة بتحاول تدلعني بس العيب فيا انا، انا اللي مبفهمش و مبقدرش. زي اليوم اللي الجيران كلموني و قالوا سامعين صويت و دربكة في الشقة و انهم بلغوا البوليس. طبعاً جريت عالبيت و انا متشحتف و لقيت امّم في الشارع و جحافل علي السلم وعربيات المطافئ محاصرة البيت. طلعت جري علي الشقة لقيت مراتي -ربنا يكملها بعقلها- متشعلقة في النجفة و بتوع المطافي بيحاولو ينزلوها، و البوليس لقي الواد ابني الصغير قاعد في الفرن بيعيط، و حماتي قافلة علي نفسها في الحمام و بترقع بالصوت. نزّلت مراتي من النجفة و اطمنت ان الواد سليم و بتوع المطافي دغدغو باب الحمام علي حماتي علشان يخرجوها و اضطروا يكتفوها لحد ماتهدأ.
انا : مالك يا حبيبتي حصل ايه؟
مراتي : انت السبب
انا : ليه بس يا ماما انا عملت ايه؟
مراتي : ( بتعيط) مش انت اللي بتقول اني ماباخدش بالي منك و بقالي ٧ سنين ما طبختلكش حاجه؟
انا : مين الجزمة اللي قال كدة؟ أنشالله يا رب اتمرمط مرمطة الاخوان لو كان ده حتي جه علي بالي! اكل ايه و زفت ايه؟ و هو فيه راجل عاقل محترم يطلب من مراته اكل؟؟ الحياه فيها حاجات اهم من الاكل و التفاهات دي. بس برضة يا روحي هي ايه علاقة النجفة بالموضوع؟
مراتي : انا قلت اعملّك صينية الفراخ اللي انت بتحبها و بتسيبني قاعدة زي القرد بتروح عند أمك مرة في الشهر علشان تاكلها.
انا : يا روحي دي أمي ساكنة في الشارع اللي ورانا و بروحلها بس لما بتروحي تدريب الكاراتيه بتاعك.
مراتي : أكيد أمك هي اللي بتسخنك عليا، هي كانت عايزاك تتجوز الشملولة بنت اختها، اياكش تولع بجاز البعيده... المهم سألت ماما بتجيب الفراخ منين فرقعت بالصوت في التليفون و قالتلي هي هتجيبها و تجيلي. قعدت أدوّر علي الفرن اللي في المطبخ لحد ماما ما توصل بس ماعرفتش ألاقيه....
انا :.....…
مراتي : ايه؟؟ مش عاجبك؟؟ انا مكنتش اعرف ان احنا عندنا فرن، انا كنت فاكراه دولاب الجزم...
انا : معلش ولا يهمك يا روحي. بس برضة ايه علاقة النجفة بالموضوع؟
مراتي : كلمتني صاحبتي انشراح و قعدنا نرغي شوية وانا بأحاول اعملّك السم الهاري اللي كنت هاطفّحوهلك النهاردة. تخيل جوزها برضة طلب منها تطبخله مخاصي و ممبار، بس الكلام ده بقالة كذا شهر...و مش لاقيين جوزها من ساعتها، اختفي، فص ملح و داب....
بلعت ريقي بالعافية و تظاهرت بالتماسك و مرضيتش اسأل عن الفقيد..الي جنة الخلد أنشالله يا ابو حنان
مراتي: المهم و انا باكلم انشراح سرحت شوية...بدل ما أحط صينية الفراخ اللي ماما كانت عملتها خلاص في الفرن، حطيت الواد بوزو. و حطيت الصينية علي الكابينيه مكان بوزو.
انا :…………
مراتي : لما ماما شافت كل ده ابتدي يجيلها حالة هيستيريه و طلعت تجري ورايا بعصاية الغليّة....انا خفت منها و ماحستش بنفسي غير وانا عالنجفة. انا مش قادرة افهم هي ليه حصلّها كدة؟ تفتكر ليه؟
انا : ماتاخديش في بالك يا روحي...أمك مجنونة! طيب يا روحي هو جوز انشراح صاحبتك بقاله قد ايه مختفي؟
مراتي : ييجي ٦ شهور كدة...اشمعني؟
لم أرد عليها. طبعت قبلة حانيه علي رأسها، و دخلت بوست الواد بوزو.
جايلك يابو حنااااااااااااااااااااااان......قلتها بصوت ملتهب و انا في طريقي الي الرصيف بعد ان قفزت من بلكونة منزلنا في الدور التاسع.
والعاقبة عندكم في المسرّات.
ليست هناك تعليقات:
إرسال تعليق